ဖေဖော်ဝါရီ ၁၃၊ လွိုင်တိုင်းလျန်း
ဖေဖော်ဝါရီလအစမှာဘဲ သျှမ်းပြည်အမျိုးသားညီလာခံတစ်ရပ်ကို သျှမ်းပြည်ပြန်လည်ထူထောင်ရေးကောင်စီ(RCSS) က ဦးဆောင်ပြုလုပ်ခဲ့ပြီး ပြည်နယ်ဖွဲ့စည်းပုံအခြေခံဥပဒေရေးဆွဲရေးအတွက်အခြေခံမူတွေကို အတည်ပြုနိုင်ခဲ့တယ်လို့ သတင်းထုတ်ပြန်ထားပါတယ်။
သျှမ်းပြည်နယ် ဖွဲ့စည်းပုံအခြေခံဥပဒေရေးဆွဲနိုင်ဖို့အတွက် အခြေခံမူ (၃၃) ချက် နဲ့ အခြေခံအခွင့်အရေး (၃၈) ချက်ကို အတည်ပြုနိုင်ခဲ့ကြောင်းဆိုပါတယ်။
အခြေခံအခွင့်အရေး (၃၈) ချက်ထဲမှာ တစ်ဦးချင်းအခွင့်အရေး ၊ ပြည်နယ်သားနဲ့ နိုင်ငံရေးဆိုင်ရာအခွင့်အရေးဆိုပြီး ပါဝင်ပါတယ်။
အခွင့်အရေးကဏ္ဍမှာ တစ်ဦးချင်းဆိုင်ရာလွတ်လပ်ခွင့်တွေကို ဘယ်အခြေအနေမျိုးမှာမဆို ဆိုင်းငံ့၊ရုပ်သိမ်းခွင့်မရှိစေရဘူးလို့ဆိုထားပါတယ်။
တစ်ဦးချင်းအခွင့်အရေးထဲမှာ အသက်ရှင်ရပ်တည်ခွင့်၊ လူမျိုး၊ဇာတိ ၊ဘာသာ ၊အဆင့်အတန်း၊အယူအဆ စတဲ့ ကွဲပြားမှုတွေကို အခြေမခံပဲ ဥပဒေအတိုင်း တန်းတူခွင့်၊ အသိအမှတ်ပြုပိုင်ခွင့် ၊ လွတ်လပ်စွာတွေးခေါ်ခွင့် တွေပါဝင်ပါတယ်။
ပြည်နယ်သားတွေကိုလည်း သတ်မှတ်ကာလအတွင်း အစဉ်တစိုက်နေထိုင်သူ ၊ ပြည်နယ်သားမိဘတွေက မွေးဖွားလာသူတွေကို ပြည်နယ်သားအဖြစ် သတ်မှတ်တယ်လို့ဆိုပါတယ်။
ပြည်နယ်သားဖြစ်ခွင့်ကိုလည်း လျှောက်ထားလို့ရပြီး မြန်မာနိုင်ငံရဲ့တခြားဒေသအပြင် ၊ ထိုင်းနိုင်ငံ သို့ ပြောင်းရွေ့ရှောင်တိမ်းနေထိုင်သွားခဲ့သူတွေအတွက်ပါ လွှမ်းခြုံမှုရှိစေရမယ်လို့ဆိုပါတယ်။
နိုင်ငံရေးအခွင့်အရေးတွေအနေနဲ့လည်း နိုင်ငံရေးကိစ္စရပ်တွေမှာပါဝင်လှုပ်ရှားခွင့်၊ အသင်းအဖွဲ့ထူထောင်ခွင့်တွေကို လွတ်လွတ်လပ်လပ်လုပ်ဆောင်နိုင်တယ်လို့ ဖော်ပြထားပါတယ်။
စီးပွားရေး၊ လူမှုရေးနဲ့ ယဉ်ကျေးမှုဆိုင်ရာ အခွင့်အရေးတွေကိုလည်း အချက် (၂၃) ချက်နဲ့ ဖော်ပြပြီး အလုပ်လုပ်ခွင့်ကစလို့ သဘာဝပတ်ဝန်းကျင်ဆိုင်ရာအခွင့်အရေးတွေကို ကာကွယ်ပေးထားတာလို့ ဖော်ပြထားပါတယ်။
ဒီလိုအခွင့်အရေးတွေပါဝင်တဲ့ ဖွဲ့စည်းပုံအခြေခံဥပဒေတစ်ရပ်ကို ဖြစ်ပေါ်လာဖို့အတွက် သျှမ်းပြည်ဖက်ဒရယ်ရေးရာဦးဆောင်အဖွဲ့ကို ဖွဲ့စည်းထားတာလို့ (RCSS) က ကြေညာထားပါတယ်။