ဇူလိုင် ၁၊ မိုးကုတ်
ရှမ်းပြည်နယ်မြောက်ပိုင်းနဲ့ မန္တလေးတိုင်းဒေသကြီး နယ်စပ်တွေမှာဖြစ်ပွားနေတဲ့ စစ်ကောင်စီတပ် နဲ့ တအောင်းအမျိုးသားလွတ်မြောက်ရေးတပ်မတော် TNLA ၊ NUG PDF ပူးပေါင်းတပ်ဖွဲ့တွေရဲ့ တိုက်ပွဲကြောင့် ကုန်စည်ပြတ်လပ်သွားပြီဖြစ်တယ်လို့ စုံစမ်းသိရှိရပါတယ်။
မန္တလေးတိုင်းဒေသကြီး မိုးကုတ်မြို့နယ်မှာ တိုက်ပွဲကြောင့် ကုန်စည်ပြတ်လပ်မှုဖြစ်ပေါ်ပြီး စျေးဆိုင်များ နဲ့ စျေးတွေ ပိတ်ထားရတာဖြစ်တယ်လို့ မိုးကုတ်ဒေသခံတွေဆီကနေ စုံစမ်းသိရှိရပါတယ်။
“ ဘာမှဝယ်လို့မရတာက ဟုတ်တယ်။ ရောင်းတဲ့ဟာတွေကလည်း အရင်ကဝယ်ထားတဲ့ဟာတွေ ၊ ကြက်ဥတွေတောင် ဝယ်မရတော့ဘူး။ ခေါက်ဆွဲတွေကောပဲ” လို့ မိုးကုတ်ဒေသခံတစ်ဦးက ပြောပါတယ်။
မိုးကုတ်မြို့အတွက် ကုန်စည်များကို မန္တလေး နဲ့ မိုးမိတ်မြို့တွေက အဓိကထား တင်သွင်းနေရတာဖြစ်ပြီး လက်ရှိ လမ်းပိုင်းအားလုံး ဖြတ်တောက် ပိတ်ဆို့ခံထားရတဲ့အခြေအနေဖြစ်ကြောင်း ဒေသခံတွေက ဆိုပါတယ်။
တိုက်ပွဲတွေကြောင့် မိုးကုတ်-မန္တလေးလမ်းပိုင်းပိတ်ထားရသလို လမ်းပိုင်းမှာလည်း လမ်းဖြတ်တောက်ဖျက်ဆီးခံထားရမှုတွေရှိတယ်လို့ စစ်ဘေးတိမ်းရှောင်လာသူတွေဆီကနေ သိရှိရပါတယ်။
တိုက်ပွဲအတွင်း လက်နက်ကြီးကျည်ကြောင့် အရပ်သားများ ၊ ကိုရင်များ သေဆုံးမှုတွေရှိနေပြီး လက်နက်ကြီးပစ်ခတ်မှုတွေအဆက်မပြတ်ရှိနေဆဲဖြစ်တယ်လို့ သိရပါတယ်။
ကျောက်မဲမြို့နယ်မှာလည်း TNLA က မြို့ပေါ်ကို ထိန်းချုပ်လိုက်ပြီးတဲ့နောက် ဒေသခံတွေဟာ ထွက်ပြေးတိမ်းရှောင်နေကြရပြီး စျေးဆိုင်တွေလည်း မရှိသလောက်ဖြစ်သွားတယ်လို့ စုံစမ်းသိရှိရပါတယ်။
TNLA ရဲ့ ၁၀၂၇ အပိုင်း(၂) စစ်ဆင်ရေးမှာ ရှမ်းပြည်မြောက်ပိုင်းက နောင်ချို ၊ ကျောက်မဲ ၊ သီပေါ ၊ မိုးကုတ် ၊ မိုးမိတ် စတဲ့မြို့နယ်တွေက စစ်ကောင်စီတပ်စခန်းတွေကို အဓိကထား ထိုးစစ်ဆင်တိုက်ခိုက်နေတာဖြစ်ပြီး တိုက်ပွဲရက်ပိုင်းအတွင်း နောင်ချို ၊ ကျောက်မဲ မြို့ပေါ်တွေကို ထိန်းချုပ်ထားနိုင်ကြောင်း ကြေညာထားပါတယ်။