နိုဝင်ဘာ ၃ ၊ မိုးညှင်း
မိုးညှင်းမြို့၊ နတ်ကြီးကုန်းရပ်ကွက်တွင်းရှိ မိုးညှင်းမြို့နယ် အခွန်ဦးစီးဌာနရုံးကို ယနေ့နိုဝင်ဘာလ (၃)ရက် မနက် ၆ နာရီခွဲအချိန်မှာ အသံမိုင်းပေါက်ကွဲမှုတစ်ခု ဖြစ်ပွားခဲ့တယ်လို့ မြို့ပေါ်နေ ဒေသခံများထံမှ သိရပါတယ်။
“ မနက်ပိုင်းလောက်ကို ဖြစ်တာ တံခါးပဲထိသွားတာ ဘာမှမထိသွားဘူး’” ဟု ရုံးအနီးနေထိုင်သူတစ်ဦးက ရှမ်းနီအသံကို ပြောပြပါတယ်။
အဆိုပါ အသံမိုင်းဖောက်ခွဲမှုကို ပြည်သူ့ကာကွယ်ရေးတပ် မိုးညှင်း K-PDF အဖွဲ့က ပြုလုပ်ကြောင်း ပေါက်ကွဲမှုဖြစ်ပွားပြီးနောက် မနက်ပိုင်းမှာပဲ ထုတ်ပြန်ပြောဆိုခဲ့ပါတယ်။
“ ယခုဖောက်ခွဲမှုဟာ လက်နက်ကိုင်မဟုတ်တဲ့ အခွန်ဦးစီးဌာနကဝန်ထမ်းတွေကို တစ်စုံတစ်ရာထိခိုက်စေလိုခြင်းမရှိဘဲ နောက်နောင် မိုးညှင်းမြို့နေ ပြည်သူလူထုအပေါ် မတရားအခွန်ကောက်ခံခြင်း မပြုလုပ်ရန်အတွက် သတိပေးခြင်းသက်သက်သာဖြစ်ပါတယ်” လို့ ထုတ်ပြန်ချက်မှာ သတိပေးပြောဆိုထားပါတယ်။
မတရားအခွန်ကောက်ခံခြင်းကို ဆက်လက်ပြုလုပ်ရင် ယခုထက် ပိုမိုပြင်းထန်တဲ့ အရေးယူမှုများ ပြုလုပ်သွားမည်ဟု ထပ်လောင်းဆိုထားပါတယ်။
အခွန်ရုံးအနီးမှာ ပြီးခဲ့တဲ့ မေလနှင့်ဇွန်လအတွင်းမှာလည်း အထက -၁ အနီးမှာရှိတဲ့ ထွေအုပ်ရုံး၊ မြို့မရဲစခန်း နဲ့ ဦးမျိုး( ရွှေမောင်း)ပိုင်တဲ့ ငွေလမင်းဆန်စက်နေအိမ်ကို မိုးညှင်း KPDF က ဖောက်ခွဲတိုက်ခိုက်မှုပြုလုပ်ခဲ့ပါတယ်။