ဧပြီ ၂၉ ၊ မြစ်ကြီးနား
ကချင်ပြည်နယ်က ဧရာဝတီမြစ်ဆုံ-မြစ်ညာ မြစ်ဝှမ်း ရေအားလျှပ်စစ်စီမံကိန်းကို တမံအရွယ်အစားနဲ့ ဆည်ရဲ့ ကြံ့ခိုင်မှုကို ဂြိုလ်တုနဲ့ ချိတ်ဆက်ပြီး အာရုံခံကိရိယာများဖြင့် ၂၄ နာရီပတ်လုံး (Reel Time Monitoring System) စနစ်နဲ့ စောင့်ကြည့်လုပ် ဆောင်သွားမယ်လို့ ကချင်ပြည်နယ်ဝန်ကြီးချုပ် ဦးခက်ထိန်နန်က ပြောဆိုလာပါတယ်။
၁၄ ကြိမ်မြောက် စီမံကိန်း ပြီးခဲ့တဲ့ ဧပြီ ၂၅ ရက်မှာ မြစ်ကြီးနားမြို့ ၊ ဧရာရပ်ကွက် မိုးလုံလေလုံအားကစားခန်းမမှာ ပြုလုပ်တဲ့ အစည်းအဝေးပွဲကနေ ပြောခဲ့တာလည်းဖြစ်ပါတယ်။
ကချင်ပြည်နယ်အတွင်း လျှပ်စစ်မီး လိုအပ်ချက်နဲ့ဒေသဖွံ့ဖြိုးရေးအတွက် အရေးပါတဲ့တွေ့ဆုံမှုတစ်ခုဖြစ်ကြောင်းနဲ့ လျှပ်စစ်မီးရရှိဖို့ တစ်ခုထဲသာမဟုတ်ပဲ ဒေသတွင်းဖွံ့ဖြိုးတိုးတက်မှု၊ လူနေမှုအဆင့်အတန်းမြင့်မားလာပြီး အလုပ်အကိုင်အခွင့်အလမ်းရရှိမှုတွေပါလာမှာ ဖြစ်တယ်လို့ ဆိုပါတယ်။
ဦးခက်ထိန်နန် နဲ့ နိုင်ငံတော်အကြံပေးကောင်စီအဖွဲ့ဝင် ဒေါ်ဒွဲဘူတို့ဟာ မြစ်ဆုံစီမံကိန်းကို ကန့်ကွက်ခဲ့သူတွေလည်းဖြစ်ပါတယ်။
သူက “ ဒေသခံပြည်သူလူထုများက လက်မခံပါက စီမံကိန်းအောင်မြင်နိုင်မှာ မဟုတ်ကြောင်း” ကိုလည်း အဲ့ဒီတွေ့ဆုံပွဲမှာဆိုခဲ့ပါတယ်။
မြစ်ဆုံစီမံကိန်း ပြန်လည်စတင်ဖို့ ပညာရှင်များနဲ့ ဒေသခံပြည်သူများပါဝင်တဲ့ ဆွေးနွေးပွဲတွေကို အကြိမ်ကြိမ်ပြုလုပ်ခဲ့ပြီး ယခုတွေ့ဆုံမှုအပါအ၀င် ၁၄ ကြိမ်ရှိခဲ့ပြီးဖြစ်ပါတယ်။
ဆည်တည်ဆောက်ရာမှာ ငလျင်ပြင်းအား ၈ မဂ္ဂနီကျူ့ ဒဏ်ခံနိုင်ရည်ရှိတဲ့ ပုံစံနဲ့ တည်ဆောက်သွားမှာဖြစ်ပြီး စီမံကိန်းကာလ ၅ နှစ်မှ ၁၀ နှစ်ခန့်အထိ ကြာမြင့်နိုင်တယ်လို့ သိရပါတယ်။
လတ်တလောမှာ ဧပြီ ၁၈ နေ့မှစပြီး (၂ )ပတ်အတွင်း ချီဖွေငယ်ရေအားလျှပ်စစ်စက်ရုံပြုပြင်နေမှုကြောင့် မြစ်ကြီးနား၊ ဝိုင်းမော်၊ မိုးညှင်း၊ မိုးကောင်း၊ ဟိုပင်၊ နမ္မား စတဲ့မြို့တွေမှာ ဓာတ်အားဖြတ်တောက်ထားကာ ဒေသတွင်းမှာ သောက်သုံးရေအခက်အခဲတွေနဲ့ ကြုံတွေ့နေရပါတယ်။